અડાસ અને પેટલાદમાં ચાઇનીઝ દોરીના 255 ફિરકા સાથે બે પકડાયા
આણંદ : ઉત્તરાયણ પર્વ પહેલા ચાઇનીઝ દોરીનો બેફામ વેપલો શરૂ થયો છે. આણંદના અડાસ ગામના ગોહિલ નગર પાટિયા નજીકથી વાસદ પોલીસે એક શખ્સને પ્રતિબંધિત ચાઈનીઝ દોરી ની ૧૫ ફીરકીઓ સાથે ઝડપી પાડયો હતો. જ્યારે પેટલાદના નવઘણ વાળા ટેકરા ઉપર આવેલી એક રહેણાંક મકાનમાં પોલીસે છાપો મારીને પ્રતિબંધિત ચાઈનીઝ દોરીના ૨૪૦ ફિરકા સાથે એક શખ્સને ઝડપી પાડયા છે.
તાલુકાના અડાસ ગામના ગોહેલ નગર પાટિયા તરફના રોડ ઉપર એક શખ્સ કોથળામાં ચાઈનીઝ દોરીના ફિરકા લઈને ઊભો હોવાની માહિતી પોલીસને મળી હતી. પોલીસની ટીમ તુરંત જ ગોહેલ નગર પાટીયા તરફના રોડ ઉપર જતા કોથળો લઈને ઊભો હોવાનું જોવા મળ્યું હતું. પોલીસે વિરલ સિંહ વિક્રમસિંહ રાજ (રહે અડાસ ગોહિલ ફળિયું)પાસેના કોથળામાં તપાસ કરતાં પ્રતિબંધિત ચાઈનીઝ દોરી ની ૧૫ ફીરકીઓ મળી આવી હતી.
અન્ય બનાવમાં પેટલાદ શહેર પોલીસે મળેલી બાતમીના આધારે પેટલાદના નવઘણ વાળા ટેકરા ઉપર રહેતા મુસ્લિમ અહેમદ ઉર્ફે રાજા જમાલુદ્દીન ખાતીબના ઘરે છાપો મારી રહેણાંક મકાનમાં તપાસ કરતા પાંચ કાર્ટુન મળી આવ્યા હતા. જેમાં પ્રતિબંધિત ચાઈનીઝ દોરીની કુલ ૨૪૦ નંગ ફિરકીઓ મળી આવી હતી. જેની અંદાજિત કિંમત રૂપિયા ૭૨,૦૦૦ જેટલી થવા જાય છે. પોલીસે મુસ્લિમ અહેમદ ઉર્ફે રાજા જમાલુદ્દીન ખાતીબ વિરુદ્ધ ગુનો દાખલ કરીને તપાસ હાથ ધરી છે.
