આણંદ જિલ્લાના મુખ્ય જિલ્લા આરોગ્ય અધિકારી ડૉ. પિયુષ પટેલ અને પીઆઇયુ (PIU) વિભાગની ટીમ દ્વારા બોરસદ તાલુકાના વિવિધ ગામોમાં આરોગ્ય કેન્દ્રોની સ્થળ મુલાકાત લેવામાં આવી હતી. આ મુલાકાતનો મુખ્ય હેતુ તાલુકામાં આરોગ્ય સુવિધાઓને વધુ મજબૂત બનાવવાનો હતો.
મુલાકાત દરમિયાન દહેવાણ, કણભા, વિરસદ અને જંત્રાલ ખાતે નિર્માણાધીન પ્રાથમિક આરોગ્ય કેન્દ્રોના બાંધકામની પ્રગતિનું નિરીક્ષણ કરવામાં આવ્યું હતું. અધિકારીઓએ સ્થળ પર હાજર ઈજનેરો અને સંબંધિત કર્મચારીઓ સાથે કામગીરીની ગુણવત્તા, સમયમર્યાદા અને જરૂરી સુવિધાઓ અંગે ચર્ચા કરી માર્ગદર્શન આપ્યું હતું.
ડૉ. પટેલે બાંધકામ ઝડપથી પૂર્ણ કરી સામાન્ય જનતાને વહેલી તકે આરોગ્ય સેવાઓ ઉપલબ્ધ કરાવવા સૂચના આપી હતી. આ ઉપરાંત, બદલપુર ગામ ખાતે નવા પ્રાથમિક આરોગ્ય કેન્દ્ર માટે નિર્ધારિત જગ્યાની પણ સ્થળ તપાસ કરવામાં આવી હતી.
બદલપુર ખાતે જમીનની સ્થિતિ, આવાગમનની સુવિધા અને ભવિષ્યમાં વિસ્તારની જરૂરિયાતોને ધ્યાનમાં રાખી યોગ્ય આયોજન અંગે ચર્ચા કરવામાં આવી હતી.
ડૉ. પિયુષ પટેલે જણાવ્યું હતું કે સરકારની જનકલ્યાણકારી યોજનાઓ અંતર્ગત ગ્રામ્ય વિસ્તારોમાં આધુનિક આરોગ્ય માળખું ઊભું કરવાનું પ્રાથમિક લક્ષ્ય છે, જેથી ગ્રામજનોને નજીકમાં જ ગુણવત્તાયુક્ત સારવાર મળી રહે. આ મુલાકાતથી બોરસદ તાલુકાના ગ્રામ્ય વિસ્તારોમાં આરોગ્ય સેવાઓ વધુ સશક્ત બનવાની અપેક્ષા છે.
